+0 به‌ین
قارین آغریسی – اورک آغریسی
دوکتور جئری
اگری-بوروق ایداره‌سی‌نین رئیسی بئش آلتی گونو ایدی قاش-قاباغینی ساللاییب کارمند‌لرله سرت داورانیردی.دوداق آلتی اؤز-اؤزونه دانیشیب هردنسه یئرسیزجه بهانه‌لر اویدوروب اونون - بونون باشینا چیغیریردی. کارمندلر قورخودان باشلارینی آشاغی سالیب میزلری آرخاسیندا کاغاذلاری گؤتور-قوی ائده‌رک سانکی موراجیعت ائله‌ینلرین ایشلرینه یئتیشیردیلر. کیمسه‌نین جینقیری چیخمیردی. داها گونده‌لیک دئییب - گولمه‌لردن خبر-اثر قالمامیشدی.
او گون یئنه رئیس زهرمار داغارجیغی کیمی میزی‌نین آرخاسیندا اوتورموشدو. ساعات اونا یاخینلاشینجا قاپی آچیلدی. ایداره‌نین چایچیسی مشدی اوروج مجمعی دولسو چایلا ایچری گیردی. ایستیکان‌لاری شاققاشاقلا کارمند‌لرین قاباغینا قویاندا ایداره‌نین یاردیمچیسی فورصت بیلیب اوزونو رئیسه چئوریب دئدی:
- جناب رئیس! نئچه گوندورناراحات گؤرونورسوز؛ آللاه ائلهمهمیش بیر شئی اولوب؟!
بیردن بیره ائله بیل رئیسین قیوریغیشی آچیلدی. دریندن بیر آه چکیب دردلری دئشیلدی:
- آقایی موعاوین! بئش آلتی گون بوندان قاباق قارنیم برکدن آغریماغا باشلادی. دوکتورا موراجیعه ائله‌دیم. موعایینه‌دن سونرا منی آزماییشا گؤندردی. تحلیل‌لریمه باخاندان سونرا دئدی، گره‌ک قیرخ گونه قدر ات، میوه، سبزی‌دن پرهیز ائله‌ییب هئچ بیرینی یئمییَم. قیرخ گوندن سونرا گئنه آزماییشی تکرار ائله‌یم. ایندی قورخورام بو قارین آغریسی منی اؤلدورمه‌سه ده آجیندان اؤلم...
بو سؤزلره دیقتله قولاق آسان مشدی اوروج، رئیسین دانیشیغینی کسدی:
- آغایی رئیس! سیز اؤزوزه نییه اذیت وئریرسیز، ایسته‌سز من گئدیب سیزین یئریزه آزماییش وئره‌رم، واللاه بیر ایلدن چوخدور دیلمه ات، میوه، سبزی دَیمه‌ییب...
بؤلوم: حیكایه و گولمه‌جه‌لر
+0 به‌ین
گؤره‌سن بیز هایانا گئدریک؟!
موللا نصرالدین بیر گون قاطیرا مینیبمیش. حئیوان اولدوقجا سورعتلی گئدیرمیش. موللا دا اونو توتا بیلمیر، دایاندیرا بیلمیرمیش.
بونو گؤرن بیر قونشوسو سوروشوبموش:
-موللا، تله‌سیک-تله‌سیک هایانا گئدیرسن بئله!؟
موللا گوجلوکله سسله‌نیب:
-قاطیر هارایا گئدرسه او یانا…
بؤلوم: حیكایه و گولمه‌جه‌لر
+0 به‌ین
گؤره‌سن مملکتین ایچینه کیم ...
دوکتور جئری
بیرگون سحرچاغی قلئیچی مورتوض ایش یئریندن آروادی خویلو خانیما تلفون آچدی:
- ناهارا یاخشی تداروک گؤر؛ مؤهوم بیر قوناغیم وار؛ گئجه ده بیزده قالاجاق..
خویلو خانیم قوناغین کیم اولدوغونو سورشماق ایسته‌سه ده مورتوض تلفونو کسدی. قادین ماراقدان چاتلاماق اوزره اولا-اولا، یئددی چئشید یئمک حاضیرلاماغا باشلادی. ساعات ایکی‌یه یاخینلاشینجا سوفره‌‌نی آچیب یئمکلری سلیقه ایله دوزمگه تام جهد گؤستردی. چوخ چکمه‌دی قاپی چالیندی. تلَسیک ائشیگه قاچدی. قاپینی آچیب قوناغین کیم اولدوغونو گؤرونجه سانکی تپه‌سینه بیر قازان قاینار سو تؤکدولر. قوناق - قایناناسی چوپور مصمه ایدی. ارینه باخیب دوداغینی بوزه- بوزه فیسیلدادی:
- ائله مؤهوم قوناغین بو ایدی؟!!
مورتوض قاشلارینی چاتیب گؤزلرینی آروادینا آغارتدی. همن هامی سوفره‌نین باشیندا أیلشیب یئمگه باشلادیلار. چوپور مصمه گؤرمه‌میشلر کیمی قاشیغینی بو قابدان او قابا سوخوب بوتون یئمکلری تپ-چئویر ائدیردی. خویلو خانیم اؤزونو ساخلایا بیلمه‌ییب دیشینی سیخا-سیخا دئدی:
- خانیم چوخ یئمه، آللاه ائلهمهمیش کهلیگین آزار، آلتینی باتیرارسان ها!
چوپور مصمه اؤزونو او یولا ووروب:
- سن قورخما قیزیم ، منه هئچ زاد اولماز.-دئدی.
گئجه، شامی ناهاردان قالان یئمکلردن یئیینجه گئنه خویلو خانیم کینایه ایله قایناناسینا دئدی:
- خانیم چوخ یئمه گئجه واختی آلتینی باتیرارسان ها!
***
ائرته‌سی گونو، قلئیچی مورتوض چیغیر-باغیر سسینه یوخودان داشلاندی. سس اوبیری اوتاقدان گلیردی:
- یئکه آرواد! بَیَم سنه دئمه‌دیم آز یئه آلتینا سیچراسان؟! باخ هریانی پوخا بلَشدیرمیسن!
قلئیچی مورتوض آناسی‌نین یاتدیغی اوتاغا قاچدی.خویلو خانیم اری‌نین گلدیگینی گؤرونجه حیرصله، ” بویور تحویل آل آغا!!‘‘ - دئیه اوتاقدان چیخدی. مورتوض آناسی‌نین یورغان دوشگینی گؤزدن گئچیردی. هریان پوخا بلشمیشدی. یازیق آرواد، اوغلونو گؤرونجه ددهسینین روحونا آند-ماند ایچه‌رک، ’’ من سیچمامیشام..‘‘- دئییب اؤکوتمه وورا-وورا آغلاماغا باشلادی. مورتوض بیرآز دوشوندوکدن سونرا اوتاقدان ائشیگه چیخیب آروادی‌نین یانینا گئتدی. آروادی اونو گؤرونجه گئنه دئیینمک ایسته‌دی آنجاق مورتوض اووجونو آچیب بیر قیزیل سیککه‌نی اونا گؤستره‌ک دئدی:
- آرواد سن بیر ایشه باخ! آنامین پوخونون ایچینده بیر سیککه تاپدیم!
خویلو خانیم قیزیل سیککه‌نی گؤرونجه جوشقولاندی:
- یالان دئدیم کیشی، آنان یئرینه من سیچمیشام!
بؤلوم: حیكایه و گولمه‌جه‌لر
+0 به‌ین
ساغا سولا ساواش آچمایین!
گئچمیشده ساواش چوخ اولوردور، بو اوزدن بوتون اوغلان اوشاق‌لارینی اوردویا چاغیریردیلار. بو دؤنمده موللا نصرالدینین ده بیرجه اوغلونو سرباز آپاردیلار. او ایکینجی اوشاغی اکمه‌یه قرار وئردی. اوردو ایکینجی اوشاغی دا سرباز آپاردی. اوچونجونو اکدی، او دا سرباز آپاریلدی. بئله گئده- گئده اونونجو اوشاغی دا سرباز گئتدی. موللا قوجا چاغیندا اون بیرینجی اوشاغی دا اکدی. دؤولت مأمورلاری اون بیرینجی اوشاغی سربازچیلیغا آپارماغا گلنده، موللا اونلارین اوستونه حیرصلنیب دئدی:
- گئدین پادیشاهیمیزا دئیین،داها بوندان بئله منیم شئییمه گوونیب ساغا سولا ساواش آچماسین!
بؤلوم: حیكایه و گولمه‌جه‌لر
+0 به‌ین
میلتین یاردیمی ؟
اؤلکه‌لرین بیرینده، بیرآدام ایشینه گئدرکن بیردن آنورمال بیر ترافیکین ایچینه دوشر؛ آنجاق ترافیک بیر سانتیم بئله ترپنمز. بیر مودت سونرا ماشینین یان شوشه‌سینه بیری‌نین تیققیلدایغینی گؤروب پنجره‌نی آچار.
- نه وار؟- دئیه شوشه‌نی چالاندان سوروشار:
- تروریست‌لر اؤلکه باشچیمیزی گیرووقان توتوبلار، بوراخماسی اوچون بیر میلیارد وئریلمه‌سه اوستونه بنزین تؤکوب یاندیراجاقلار.
- هه، ایندی ترافیکین سببینی آنلادیم...
- بونون اوچون هرکسدن بیرآز یاردیم ییغیریق.
- اورتالاما اولاراق هر کس نه قدر وئریر؟
- واللاه هرکس تقریبا اوچ لیتر!..بؤلوم: حیكایه و گولمه‌جه‌لر
+0 به‌ین
بوشونا بوشانماق
دوکتور جئری
گئچن گون محکمه‌نین قارشیندان گئچرکن قاباغیندا اوستاد دفتری ایله خانیمینی گؤردوم. بیربیرلری دالاشیر کیمی ایدیلر. نیگران اولوب اونلارا یاخینلاشدیم. ”خئیر اولا اوستاد سیز هارا بورا هارا؟!‘- دئیه سوروشدوم. اوستاد دفتری قوندارما دیشلرینی سیخا-سیخا جاواب وئردی:
- خانیمدان سوروشون! ایکی آیاغینی بیر باشماغا سوخوب مندن بوشانماق ایسته‌ییر..
خانیم دفتری‌یه دؤنوب:
- آی باجی بو ایشلر سیزدن ایراقدیر، ماشاآللاه سیزین نوه- نتیجه‌نیز وار، بو یاشدا بوشانماق عاییب دئییل می؟- دئیه قینادیم.
خانیم دفتری چادیراسی‌‌نین اوجونو دیشینده سیخا - سیخا دانیشماغا باشلادی:
- آغا دوکتور! واللاه – بیللاه من بوندان(باشی ایله اوستاد دفترینی گؤستردی) نه قیزیل ایسته‌ییرم، نه پالتار ایسته‌ییرم، نه پول ایسته‌ییرم. بیله‌سینه دئییرم ات آل دئییر ات باهادیر آلانمیرام، دئییرم تویوق آل دئییر باهادیر آلانمیرام. دئییرم میوه آل دئییر باهادیر آلانمیرام، هر نمنه دئییرم دئییر باهادیر آلانمیرام. بوگون سحر بیله‌سینه دئدیم ناهارا نوه‌لریم قوناق گله‌جکلر گئت بیرآز یئرآلما- سوغان آل اوشاقلارا هئچ اولماسا یاغ شورباسی پیشیریم. چیگینلرینی سیلکه‌له‌ییب دئدی: قوناقلیغی ساخلا گلن آیا، ایندی پولوم یوخدور. من ده دئدیم : سنکی بیر کیلو یئرآلما-سوغان آلماغا قادیر دئییلسن ائله یاخشیسی بودور منی بوشایاسان هم منیم هم ده سنین جانین قورتولسون...
خانیم دفتری‌نین سؤزلری بورا یئتشینجه باشیمی توولاییب دئدیم:
- من ده هله دئییرم سیز نمنه‌نین اوستونده بوشانماق ایسته‌ییرسینیز. آدام دا مگر بیر کیلو یئرآلما-سوغانین اوستونده بوشانار. گلین..گلین تئز گئدین ائوینیزه ......
بؤلوم: حیكایه و گولمه‌جه‌لر
+0 به‌ین
ایقتیصادی فیشاردان قورتولماغین یولو تاپیلدی
دوکتور جئری
اوستاد دفتری‌دن سوروشدوم:
- سیزجه بو تورم و باهالیقلا، میللت بو دؤزولمز ایقتیصادی فیشاری نئجه تحمول ائدیر؟
اوستاد دفتری گولومسه‌ییب دئدی:
- سؤیوش-یامان دئمکله!
جاوابیندان چاش- باش اولدوغومو گؤرونجه آچیقلادی:
بیلیم اینسانلاری‌نین یئنی آراشدیرماسی گؤستریر: سؤیوش بدن پرفورمانسینی (عملکردینی) یاخشیلاشدیریر. بو آراشدیرمانین نتیجه‌لری اساسیندا، بوتون مدنیت‌لرده آنورمال داورانیش حساب ائدیلن سؤیوش بدن پرفورمانسی‌نین آرتماسی ایله علاقه‌لی اولوب اینسانلارین یوخوشا چیخماق کیمی آغیر فیزیکی ایشلرده داها چوخ چالیشماسینا یاردیم ائدیر.
بو اوزدن میللتیمیزده ایقتیصادی فیشارا دوشونده، یئر-گؤیه مسئول‌لارا سؤیوش-یامان دئمکله بو دوزلمز فیشارلادان اؤزلرینی قورتارمیش اولور....
بؤلوم: ساتیریک یازیلار
+0 به‌ین
میللته کورلوق وئرمه‌یین!
دوکتور جئری
میللتین ایلکین احتیاج‌لاری‌‌نین قیمتی، گونو-گوندن باهالاشینجا چؤرگین قیمتی‌‌نین ده آرتاجاغی نئچه واخت ایدی دیللره دوشموشدو. بونو ائشیدن شیخ آغامیز تئز ایلگیلی مسئول‌لاری حوضورونا چاغیریب اوست‌لرینه قیشقیریب دانلادیقدان سونرا دئدی:
- میللته یاوان چؤرک طرفیندن کورلوق وئرمه‌یین، بیزیم گؤزوموز کور خاویار یئیه‌ریک!
بؤلوم: حیكایه و گولمه‌جه‌لر
+0 به‌ین
یاغیش دوعاسی
دوکتور جئری
قوراقلیق ایللرینده شیخ آغا بیر مدرسه‌یه گئده‌رک مودیرینه دئییر:
- اوشاق‌لارین اورگی پاکدیر، تمیزدیر. هرنه دوعا ائله‌سه‌لر آللاه درگاهیندا قبول اولار. ایجازه وئرسه‌نیز اونلارلا بیرگه یاغیش دوعاسی اوخویاق بلکه آللاهی تبارک و تعالی رحمت قاپی‌لارینی اوزه‌ریمیزه آچیب یاغیش یاغدیرا...
مدرسه‌نین مودیری گوجلوکله گولمه‌سینی قاباغینی آلیب دئییر:
- آغا! باغیشلایین ها.. اوشاق‌لارین دوعاسی قبول اولسایدی ایندی مدرسه‌ده بیرجه موعلیم بئله دیری قالمامیشدی!
بؤلوم: حیكایه و گولمه‌جه‌لر
+0 به‌ین
یاغیش نامازی
قوراقلیق ایللرینده، بیر کندده یاغیش نامازینا چیخارلار. بیر بکتاشی ده اونلارین آردینجا گئدر. جاماعاتین آرخاسیجا گئدرکن بیر آغاج بوداغی تاپیب باشینی دیک توتاراق اؤز تارلاسینا باتیریب،
- " آللاه! بوراسی بیزیم تارلامیزدیر. هئچ اولماسا یاخشی بیر یاغیش یاغدیر دا، سوواریلسین " ، - دئیر.
یاغیش نامازی بیتینجه هامی ائوه قاییدیر و ائله او آخشام گوجلو بیر یاغیش و دولو یاغماغا باشلار. بکتاشی سحر اؤز تارلاسینا باش چکمه‌یه گئدر. بس نه گؤرسه یاخشی‌دیر؟ دولو، تارلاسینداکی بوتون محصول‌لاری محو ائدیب اونلاری تورپاغا قاتمیشدی. بکتاشی بونو گؤرونجه باشینی گؤیه قالدیرارق آللاها بئله خطاب ائدر:
" آللاهیم گوناه سنده دئییل، سنه تارلانی گؤسترن قورومساقدادیر " .
بؤلوم: حیكایه و گولمه‌جه‌لر
+0 به‌ین
شیخ آغانین اینگی
دوکتور جئری
شیخ آغانین قارتالمیش بیر اینگی وار ایدی. پول احتیاجی اوزوندن اونو بازارا آپاریب ساتماق ایسته‌ییر. موشتری‌لر گلیب اینگین آغزینی آچیب دیشلرینه باخیب قوجالدیغینی گؤرونجه آلماقدان واز گئچیب اوزاقلاشیردیلار. شیخ آغا بیر- ایکی هفته حئیوانی بازارا آپار-گتیر ائله‌یندن سونرا، اینک موشتری گؤرنده اؤزو آغزینی آچیب دیشلرینی گؤستریردی!
بؤلوم: حیكایه و گولمه‌جه‌لر
+0 به‌ین
سیاست ندیر؟
علی اوچونجو صینیفده اوخویان عاغیللی بیر اوغلاندیر. بیر گون موعلیمی علی‌دن" سیاست "-ین نه اولدوغونو سوروشور. علی فیکیرلشیر، آما جاواب تاپا بیلمیر. ائوه گئدیب کیتاب‌لارا باخیر، آما هئچ نه باشا دوشه بیلمیر. آتاسیندان سوروشماق قرارینا گلیر.
– آتا، سیاست ندیر؟
آتا دوشونور. بونو علی‌یه اویغون بیر شکیلده ایضاح ائتمه‌یه چالیشیر.
– بو ائوین پولونو کیم گتیریر، اوغلوم؟
" سن... "
" من کاپیتالیست رئژیمم. بس پولو آلیب یئمک، ایچکی و گئییم کیمی احتیاج‌لاریمیزی کیم تأمین ائدیر؟ "
" آنام... "
" بو حؤکومتدیر. "
بس سیزین کیچیک قارداشینیزا کیم باخیر؟
" دایه‌م... "
" بئله‌لیکله دایه‌ن ایشچی، قارداشین گله‌جک، سن ایسه میللت‌‌سن" .
علی آتاسی‌نین دئدیکلرینی قئیده آلدیقدان سونرا گئدیب یاتیر.
*
گئجه یاریسی علی غریبه سسلره اویانیر. بیردن قارداشی‌نین آغلادیغینی گؤرور. یانینا گئدنده آلتینی باتیردیغینی آنلاییر. درحال آناسینی اویاتماغا چالیشیر. آنجاق نه ائتسه ده، آناسی آیاغا قالخمیر. بو واخت او، قوناق اوتاغیندان گلن سسلرله ماراقلانیر و قوناق اوتاغینا کئچیر.
آتاسینی و دایه‌سینی اویغونسوز بیر وضعیتده گؤرونجه علی‌نین آغزیندان بو سؤزلر عینا تؤکولور:
-کاپیتالیست رئژیمی ایشچی‌لری ایستیثمار ائدیر، حؤکومت یوخودادیر، گله‌جک پوخ ایچینده‌دیر، میللت نه ائده بیلر؟...
بؤلوم: حیكایه و گولمه‌جه‌لر
+0 به‌ین
مسئوللار یالانچی دئییللر!
دوکتور جئری
دونن اوستاد دفترینی ائل باغیندا گؤردوم. اوتوراجاقدا أیلشمیش هردن اللرینی گؤیه قالدیریب اؤز-اؤزونه نسه دئییر، هردنسه ده یاخاسینی ایکی بارماغی ایله آرالاییب دؤشونه توپوروردو. یاواش- یاواش بیله‌سینه یاخینلاشدیقدا ائشیتدیم دئیینیر:
- استغفرالله... استغفرالله...آللاه منی باغیشلا... تؤوبه... تؤوبه... توف توف..
اهمالجا الیمی آرخادان چیگنینه قویدوم. دیسکینن کیمی اولدو.
- اشی نولوب؟ نییه اؤز-اؤزونه دانیشیرسان؟!
آیاغا قالخیب اؤپوش-گؤروشدن سونرا دئدی:
- آا بگ بیلمیرسنکی نه بؤیوک گوناها باتمیشام؟
چاشقینلیقلا،’’ نه گوناهی؟!‘‘ دئیه سوروشدوم.
اوستاد بیر ایکی کره یاخاسینا توف توف ائله‌یندن سونرا آچیقلادی:
- من ایندییه‌دک بئله دوشونوردوم؛ مسئول‌لارین هامیسی یالانچی‌دیرلار و اؤلکه‌نی یالان-پالان، فیریلداقلا ایداره ائدیرلر. آنجاق نئچه گوندور اؤیرنمیشم بتر یانیلمیشام..
دوداقلاریمی بوزدوم:
- هله یانیلدیغینی هارادان آنلادین؟
ماییل- ماییل گؤزومون ایچینه باخدی:
- آنلاماغی چتین بیر ایش دئییل. گؤرمورسنمی؛ مسئوللار دئینده فیلان ساعاتدا برق‌لر کسیله‌جک تام واختیندا برق‌لر کسیلیر. دئیینده فیلان ساعاتدا سولار کسیله‌جک دیقه‌سی کئچمه‌دن سولار کسیلیر. دئینده اینترنت کسیله‌جک....
داها اوستاد دفتری‌نین سسینی ائشیتمیردیم اللریمی گؤیه قالدیریب دئدیم:
- آللاه منی ده باغیشلا!!
بؤلوم: حیكایه و گولمه‌جه‌لر
+0 به‌ین
لوطفن سؤزو کسین!
دوکتور جئری
کئچن‌لرده تورکیه‌دن اورهان آدلی بیر قوناغیمیز گلمیشدی. بئش-آلتی گون اونو اویان –بویاندا گزدیردیکدن سونرا بیله‌سیندن سوروشدوم:
- سیز ایرانلی‌لاری نئجه گؤردونوز؟
اورهان گولومسه‌ییب دئدی:
- واللاه ایرانلی‌لار چوخ یاخشی بیراینسان‌لاردیر آنجاق تأسوفله اونلارین چوخ پیس بیر عادت‌لری وار.
چاشقینلیقلا سوروشدوم:
- نه پیس عادتی؟!!
اورهان باشینی آشاغی سالاراق جاواب وئردی:
- دانیشاندا تئز-تئز بیربیرلری‌نین سؤزونو کسیرلر و ...
اورهانین سؤزونون اورتاسینا آتلاندیم:
- قارداش! بورادا گره‌ک تئز دانیشانین سؤزونو کسیب سؤزونو دئیه‌سن یوخسا طرف ساعات‌لارجا و یا بلکه‌ده ایللرجه دانیشیب سنه دانیشماق و یا فیکرینی بیلدیرمک ماجالی وئرمه‌یه‌جک!
بؤلوم: ساتیریک یازیلار
+0 به‌ین
